First Nepali died of Coronavirus in USA cremated in New York
Exclusive: कोरोनाभाईरस महामारी रोगबाट मार्च २४ तारिख १२:३० मा निधन भएका न्यू योर्क कुईन्स शहर निवासी ४९ वर्षीय नेपाली अनिल थाम्सुहांग लिम्बु (उर्फ़ रमेश साम्बाहाम्फे) को शनिवार अपरान्ह २:३० मार्च २८ तारिख ग्रिनवुड सिमेटरी, ब्रुक्लिन, न्यू योर्कमा अन्तिम दाहसंस्कार गरिएकोछ। कोरोनाभाईस सरूवा रोग भएको कारण स्व. लिम्बुको दाहसंस्कारमा परिवारका कुनै सदस्य सहभागी हुन नमिलेकोले सिमेटरीको एडमिनिस्टरले गर्नु परेको तर लिम्बु परम्परानुसार रोगको रोकथाम पछि दाहसंस्कार कृया सम्पन्न गरिने कुरा नेपाली जनसम्पर्क समिति अमेरिकाका केन्द्रीय महासचिव एवं स्वर्गीय लिम्बुका नेपालमा एउटै जिल्लावासी पाँचथरका, नेपालदेखिकै चिनजानका मित्र मुनिन्द्र नेम्बांग लिम्बुले नेपालिजम डट कमलाई जानकारी गराए। स्व. लिम्बुको उपचार र निधन न्यू योर्कको एल्महर्स्ट अस्पतालमा भएको थियो। अमेरिकामा कोरोनाभाईसबाट निधन हुने उनी पहिलो नेपाली हुन्। उनलाई विगत १०-११ दिन देखि रूघाज्वरो आएर अस्पताल आउनेजाने गरेको तर निधन हुनु ५ दिन अघि कोरोनाभाईरस रोग लागेको रिजल्ट आएको र ४ दिनदेखि भेन्टीलेटरमा राखिएको थियो। दाहसंस्कारको लागि लाग्ने शुल्क स्व. लिम्बुकी श्रीमतिले तिरेकी थिईन्।स्व. अनिल सुब्बा लिम्बुको परिवारको सहयोगको लागि शुरू गरिएको GoFundMe एकाउण्टमा हालसम्म $१७,८१६ अमेरिकी डलर संकलन भएकोछ। स्वर्गीय लिम्बूका श्रीमति, दुई छोरा र एक छोरी घरमै सेल्फ कोरिन्टिनमा रहेकाछन्।
अनिल लिम्बु (उर्फ़ रमेश साम्बाहाम्फे) को हुन्?
स्वर्गीय अनिल लिम्बु (उर्फ़ रमेश साम्बाहाम्फे) बिसं. २०२७ सालमा नेपालको पाँचथर जिल्लाको हाल कुम्मायक गाउँपालिका वडा ने. ४ रानीगाउँमा जन्मेका थिए। उनी बिगत २०-२१ वर्षदेखि अमेरिकाको न्यू योर्क शहरमा बसोबास गर्दै आएका थिए। न्यू योर्कमा हाल उबर ट्याक्सी संचालन गर्दै आएका स्वर्गीय लिम्बूका श्रीमति, दुई छोरा र एक छोरी छन्।
स्व. लिम्बुका जिल्लावासी मित्र युवा नेता मुनिन्द्र नेम्बांगका अनुसार स्व. अनिल लिम्बु पूर्व स्थानीय बिकास मन्त्री तथा नेपाली काँग्रेसका केन्द्रीय सदस्य स्व. पूर्ण कुमार शेर्माका साख्खै भान्जा हुन्।
किरात याक्थुम चुम्लुंग अमेरिकाको पूर्व उपाध्यक्ष रहेर सामाजिक कार्यमा संधै तल्लीन र अग्रसर रहने अनिल लिम्बु नेपाली समाज अमेरिकाका केन्द्रीय सदस्य थिए। अमेरिकामा गैरआवासीय नेपाली संघ स्थापना भएपछिको पहिलो एनआरएन न्यू योर्क च्याप्टर (२०१५-२०१७) को बोर्ड अफ डाईरेक्टर समेत बने । उनी जनसम्पर्क समितिको कृयाशील सदस्य र रेष्टुरेण्ट व्यावसायी पनि थिए।केही समय यता उनले राईड शेयरिंग उबर चलाउँदै आएका थिए।
स्वर्गीय अनिल लिम्बुकी श्रीमति गृहिणी हुन् भने उनका एक २२ वर्षीय छोरा, एक २० वर्षीय छोरी (जोनर्सिंग अध्ययनरत) र अर्का ११ वर्षीय छोरा (अमेरिकामा जन्मिएका) छन्। उनकै कमाईमा यो लिम्बुपरिवार निर्भर रहेको थियो।
न्यू योर्कमा झण्डै १५/२० जना नेपाली संक्रमित
न्यू योर्कमा झण्डै १५/२० जना नेपालीलाई कोरोनाभाईरसको संक्रमण लागेको नेपाली समाजका अगुवाहरूले उल्लेख गरेकाछन्। यो रोगबाट नेपाली डाक्टर, रेष्टुरेण्ट व्यावसायी, भिडियोग्राफर, ट्याक्सी ड्राईभर लगायतका पेशामा रहेका नेपालीहरू संक्रमित भएको जानकारी प्राप्त भएकोछ।
युकेमा कोरोनाभाईरसबाट एक नेपालीको मृत्यू
यसैबिच, कोरोनाभाईरसको महामारीबाट युकेका एक नेपाली पूर्व गोरखा सैनिक, ६६ वर्षीय लीलाबहादुर राईको मृत्यु भएको छ । संखुवासभा खांदबारी नगरपालिका १० स्थायी घर भई हाल लन्डन साउथ ह्यारोमा बस्दै आएका राईको मंगलबार, मार्च १७ तारिख लण्डनस्थित नर्थवीक पार्क अस्पतालमा निधन भएको समाचार भोईसअफनेपाल टिभि डट कमले प्रकासन गरेकोछ।
कोरोनाभाईरसको महामारी र फैलावट
कोरोनाभाईरसको महामारीले अहिले विश्व आक्रान्त र ठप्प भएकोछ। हालसम्म विश्वभर १७७ देश रक्षेत्रका ६ लाख ४९ हजार ९०४ जनालाई कोरोनाभाईरसको महामारी लागेको छ भने ३० हजार २५९ जनाको मृत्यू भैसकेकोछ। अमेरिकामा १ लाख १७ हजार ०१४ जनालाई कोरोनाभाईरसको महामारी लागिसकेको छ भने १,९७३ जनाको मृत्यू भैसकेकोछ। त्यसमध्ये न्यू योर्क राज्यमा सबैभन्दा बढी ५२ हजार ३१८ जनालाई कोरोनाभाईरसको संक्रमण भएको छ भने ७२८ जनाको मृत्यू भैसकेकोछ।(स्रोत: जोन हप्किन्स विश्वविद्यालयको डाटा, मार्च २८, २०२० अनुसार) ।
コメント