न्यू योर्कमा ‘नेपाल डे’ र ‘एभरेष्ट डे’ मे २९ तारिख दुई दिवसकारूपमा भव्यतापूर्वक सम्पन्न

Updated: Exclusive: न्यू योर्क सहरका नेपालीहरूले ‘नेपाल डे’ र ‘एभरेष्ट डे’ मे २९ तारिख दुई दिवसका रूपमा भव्यतपूर्वक मनाएकाछन्। न्यू योर्क राज्य सभाले एसेम्वली रिजोलुसनद्वारा मे २९ तारिखलाई ‘नेपाली-अमेरिकन हेरिटेज डे’ को रूपमा मनाउने घोषणापछि नेपालीहरू अझ उत्साहित भएका हुन्। उसो त, नेपालको गणतन्त्र दिवस र सगरमाथा दिवस संयोगले एउटै दिन परेकोले मे २९ तारिख विश्वभरका नेपालीहरूले हरेक वर्ष मनाउँदै आएकाछन्। तर अमेरिकी भूमिमा अमेरिकी सरकारको न्यू योर्क राज्य विधानसभाबाट मान्यता दिनु अमेरिकी नेपालीहरूले गर्व गर्नु पर्ने दिनको रूपमा लिईनु पर्दछ।

न्यू योर्क राज्य विधानसभा सदस्य जेनिफर राजकुमारले आयोजकहरूलाई छुट्टाछुट्टै आयोजित समारोहरूमा न्यू योर्क राज्य विधानसभाबाट पारित न्यू योर्क राज्य सभाले एसेम्वली रिजोलुसनद्वारा ‘नेपाली-अमेरिकन हेरिटेज डे’ एसेम्वली रिजोलुसन हस्ताक्षरण गरेकी थिईन्।

’नेपाल डे’ परेडको आयोजन नेपाल आदिवासी जनजाति महासंघ अमेरिका (फिप्ना) को पहलमा नेपाल डे परेड मूल समारोह समितिले गरेको थियो भने विश्व समगरमाथा दिवस समारोह यू एस नेपाल क्लाईम्बर्स एसोसिएशन र युनाइटेड शेर्पा एसोसिएशनद्वारा संयुक्त रुपमा आयोजना गरिएको थियो।

यू एस नेपाल क्लाईम्बर्स एसोसिएशनद्वारा जारी

प्रेस विज्ञप्ती

में २९, २०२१

न्यू योर्क राज्यले मे २९ का दिनलाई सगरमाथा दिवसको रुपमा मनाउने निर्णय गरेको छ । विश्वको सर्वोच्च शिखर सगरमाथा माथि प्रथम पटक मानव पाईला टेकेको एैतिहासिक दिनको स्मरणमा अन्तरराष्ट्रिय सगरमाथा दिवसको रुपमा मनाईने निर्णय भएको घोषणा न्यू योर्क राज्य बिधान सभासदस्य जेनिफर राजकुमारले गर्नु भएको हो । यू एस नेपाल क्लाईम्बर्स एसोसिएशन र युनाइटेड शेर्पा एसोसिएशनद्वारा संयुक्त रुपमा आयोजित विश्व सगरमाथा दिवसको उपलक्ष्यमा प्रमुख अतिथिको आसनबाट बोल्दै बिधान सभा सदस्य राजकुमारले अर्को सालको विश्व सगरमाथा दिवस न्यू योर्कको राजधानी आल्बनीको एसेम्ब्ली हलमा मनाउनका लागि निमन्त्रणा पठाइने जानकारी समेत गर्नु भयो ।

कोभिड्-१९ को कारण ठुल्ठुला जमघट गर्न नमिल्ने भएको र मातृभूमि नेपालमा हज्जारौं दाजुभाईदिदीबहिनीहरुले ज्यान गुमाईरहेको अवस्थामा बढी तामझाम् गर्नु उपयुक्त नहुने भएकोले गत साल र यस सालको सगरमाथा दिवस ज्यादै सीमित अतिथिहरुको उपस्थितिमा गर्न वाध्य भयौं ।कार्यक्रमको शुरुमा दीप प्रज्वलन गरी हिम आरोहणका क्रममा दिवंगत हुने आरोहीहरु र कोभिड्-१९ कारण ज्यान गुमाउन परेका सबैको चिर शान्तिको लामा गुरुहरुबाट पूजा प्रार्थना गरिएको थियो।

अतिथिको आसनबाट बोल्नु हुँदै जि पि के फाउन्डेशन अमेरिकन च्याप्टर अध्यक्ष सोमनाथ घिमिरेले मे २९ को दिनलाई सगरमाथा दिवसको रुपमा मनाईने गरी न्यू योर्क स्टेट एसेम्वलीको निर्णय प्रति आभार प्रकट गर्दै यो दिवसको अस्तित्व मेटाउने गरी अन्य कुनै दिवस ल्याउन नहुने कुरा बताउनु भयो । रोटरी क्लबका सहायक गभर्नर नवराज केसीले सगरमाथा दिवस हामी सबैको गौरब भएको हुनाले यस दिवसको पहिचान जोगाउन हामी सबै जागरुक हुनु पर्ने बताउनु भयो । कार्यक्रममा न्यू योर्क काउन्सिल डिस्ट्रिक्ट-25 का पूर्व चीफ् स्टाफ क्यारोलिन् ट्र्यान, शेर्पा किदुगका पूर्व अध्यक्ष तथा आदिबासी जनजाति महासंघ अमेरिकाका संस्थापक अध्यक्ष कर्मा ग्याल्जेन शेर्पा, किदुगका पूर्व अध्यक्ष तथा क्वीन्स् कम्युनिटी बोर्ड सदस्य उर्गेन शेर्पा, यू एस नेपाल क्लाईम्बर्स एसोसिएशनका संस्थापक अध्यक्ष किपा शेर्पा र शेर्पा संघ अमेरिकाका अध्यक्ष आङ जाङ्बु शेर्पाले आआफ्नो मन्तव्य राख्नुभएको थियो ।

शेर्पा किदुगका अध्यक्ष छिरिङ् शेर्पाले ‘मे २९ भनेको नेपाल डे पनि होइन यो दिन सगरमाथा दिवसको रुपमा स्थापित भैसकेको छ” भन्नु भयो । यू एस नेपाल क्लाईम्बर्स एसोसिएशनका अध्यक्ष पासाङ् निमा शेर्पाले न्यू योर्क राज्यले मे २९ लाई सगरमाथा दिवसको रुपमा मनाउने निर्णयको स्वागत गर्दै न्यू योर्क राज्य सरकार र यू एस नेपाल क्लाईम्बर्स एसोसिएशनलाई विभिन्न क्षेत्रबाट सहयोग गर्नुहुने सबैलाई धन्यवाद दिनु भयो ।

प्रमुख अतिथि एसेम्ब्ली मेम्बर जेनिफर राजकुमारले क्लाईम्बर्स अध्यक्ष पासाङ् निमा शेर्पालाई राज्य सरकारबाट सगरमाथा दिवसको नाममा दिएको रिजोलुशन प्रमाणपत्र, यू एस नेपाल क्लाईम्बर्स एसोसिएशनलाई साईटेशन र अध्यक्ष पासाङ् ङिमा स्वयंलाई पनि प्रसंशा स्वरुप ब्यक्तिगत साईटेशन गरी तीनवटा प्रमाणपत्र एकै पटक हस्तान्तरण गर्नु भयो ।

विभिन्न विश्व कीर्तिमानी आरोहीहरु लगायत सगरमाथाको सफल आरोहण गरिसकेका चालिस जनाभन्दा बढीको उपस्थितिले समारोहको गरिमा बढेको थियो । कार्यक्रम संचालन संस्थाका महासचिब मिङ्मार लामाले गर्नु भएको थियो ।

यू एस नेपाल क्लाईम्बर्स एसोसिएशन